UMUYOBOZI W’AKARERE YASHISHIKARIJE ABAKOBWA BIGA MURI KAMINUZA Y’U RWANDA GUPIGANIRA IMYANYA YO MU NZEGO Z’IBANZE

Ku wa kabiri tariki 01 z’uku Kwezi Mu kiganiro Umuyobozi w’Akarere, Mukamana Soline yagiranye ku wa kabiri tariki 01 z’uku Kwezi n’abanyeshuri 600 biga muri Kaminuza y’u Rwanda biganjemo urubyiruko bitabiriye University of Rwanda – Mastercard Foundation Scholars Summer Camp 2026 ubera mu Kigo cy’Ubutore cya Nkumba, mu Murenge wa Kinoni yashishikarije abakobwa biga muri iyo Kaminuza gupiganira imyanya yo mu Nzego z’imitegekere zegerejwe abaturage (Inzego z’ibanze), ndetse n’indi imyanya ifata ibyemezo.

Abo banyeshuli baturutse mu mashami ya Kaminuza y’u Rwanda ari hirya no hino mu Gihugu. Insanganyamatsiko y’ikiganiro yagiranye na bo yare: “Ubuyobozi mu nzego z’ ibanze bugamije impinduka ku baturage."

Icyo kiganiro cyari kigamije gukangurira urubyiruko kumenya imikorere y’inzego z’ibanze, gukorana na zo no kubashishikariza  kuzikoramo, kubabwira ibiranga Umuyobozi mpinduramatwara mu nzego z’ibanze, gushishikariza abitabiriye Summer Camp 2026 guharanira kuba umusemburo w’impinduka mu miyoborere n’iterambere ry’Igihugu, kubashishikariza gukunda no gukora mu nzego z’ibanze , uruhare rw’umukobwa  n’umugore  mu miyoborere y’inzego z’ibanze, kwirinda ibinyobwa bitujuje ubuziranenge, ibiyobyabwenge n’inda ziterwa Abangavu. 

Yabasobanuriye kandi Urunana rw’Abagore bakora mu Nzego z’imitegekere zegerejwe abaturage abereye Umuyobozi wungirije agira ati:" Uru Runana rufasha abagore bakora mu nzego z’ibanze kungurana ibitekerezo n’ubumenyi, kwigiranaho, kuba mu nshingano zabo  neza no kubakangurira  kurangwa n’indangagaciro mu nshingano zabo, kuba abagore b’abayobozi,abagore b’Ababyeyi ndetse na Mutimawurugo."

Yasabye kandi urwo rubyiruko kurangwa n’imyitwarire myiza, bakirinda ubusinzi, ubuzererezi, kunywa ibiyobyabwenge n’ibinyobwa bitujuje ubuziranenge birimo inzoga zizwi nk’Ibyuma n’ibindi byagira ingaruka mbi ku hazaza habo.