KWITA KU BUZIMA BW'UMWANA MU MINSI 1,000 YA MBERE Y'UBUZIMA BWE BIRI MU BYAMURINDA IMIRIRE MIBI IGWINGIRA: UMUYOBOZI W’AKARERE

Mu kiganiro Umuyobozi w'Akarere, Mukamana Soline yagiranye kuri uyu wa gatatu Kanama 2026 n'abatuye Imirenge ya Nemba na Ruhunde bitabiriye ibirori byo kwizihiza Umunsi Mpuzamahanga w'Urubyiruko byabereye mu Kagari ka Nyamugali, muri Nemba wateguwe ku nsanganyamatsiko igira iti:"Kubaka ubushobozi bw'urubyiruko hagamijwe kubyaza umusaruro amahirwe ahari." yababwiye ko kwita ku mwana mu minsi igihumbi ibanza y'ubuzima bwe biri mu byamurinda imirire mibi n'igwingira.

Uyu munsi mukuru wahujwe n’ubukangurambaga ku kurwanya imirire mibi n’igwingira bwateguwe ku bufatanye na World Vision, Ikigo cy'Igihugu gishinzwe imikurire no kurengera umwana n'Urunana Development Communication.

Yagize ati:"Muri iyo minsi igihumbi, abatwite bakwiriye kwipimisha inda inshuro umunane, bakabyarira kwa Muganga, bagakingiza abana inkingo zose esheshatu, bakaboneza urubyaro, bagapimisha abana imikurire, bakonsa abana kugera ku mezi atandatu nta kindi babavangiye;nyuma y'icyo gihe bakabaha inyunganiramirire igizwe n'indyo yuzuye, bakubahiriza n'ubundi burenganzira bw'abana."

Yababwiye kandi ati:"Umwana witaweho uko bikwiye mu minsi 1,000 ya mbere y'ubuzima bwe akura neza; haba mu gihagararo ndetse n’ubwenge. Kwita neza ku mwana muri icyo gihe ni ugutegura Abanyarwanda bafite ubushobozi bw’umubiri n’ubwenge bwo gukora; bakiteza imbere, bakagira n’uruhare mu iterambere ry’Igihugu. Iyi ni inshingano ya buri mubyeyi n'undi wese ushinzwe umwana ."

Yakanguriye ababyeyi kugira isuku umuco, bakirinda n'ibindi byatera imirire mibi n'igwingira ry'abana birimo amakimbirane mu miryango, ubuharike n'ubushoreke, kunywa ibiyobyabwenge n'ibinyobwa bitujuje ubuziranenge, ubusinzi n'ababyeyi batuzuza inshingano bafite ku bana. 

Yasabye kandi ababyeyi kwita ku nshingano zo kurera neza abana, bakaba abaturage beza barangwa n'indangagaciro na kirazira by'umuco Nyarwanda zirimo ubutwari no gukunda Igihugu.

Yasabye urubyiruko kwirinda no kureka kunywa ibinyobwa bisembuye, ubuzererezi n'ibindi byakwangiriza ahazaza habo. 

Yabwiye abitabiriye ibyo birori ingaruka zo kunywa ibiyobyabwenge n'ibinyobwa bitujuje ubuziranenge, abagira inama yo kubyirinda, bakagira kandi uruhare mu kubirwanya batanga amakuru yerekeye ababyenga ndetse n'ababicuruza.

Abagize Urunana DC, babinyujije mu mikino, batanze ubutumwa ku babyitabiriye ku kurwanya imirire mibi n'igwingira n'akamaro ko konsa umwana. 

Umuyobozi w'Akarere yashimye Urunana DC na World Vision ku ruhare rwabo mu kurwanya imirire mibi n'igwingira ry'abana bato no gutegura neza urubyiruko rw’ejo hazaza haherewe ku kwita ku mikururire myiza y’Umwana.

Yashimye kandi Ikigo cy'Igihugu gishinzwe imikurire no kurengera umwana kuba cyifatanyije n'Akarere ka Burera mu birori byo kwizihiza umunsi Mpuzamahanga w'Urubyiruko.

Mu byaranze ibirori byo kwizihiza uyu munsi mukuru harimo guha abana amata, ababyitabiriye babwirwa ibyo bakwitaho mu gukumira no kurwanya imirire mibi n'igwingira.